Manif per lei calancas (en occitan)

A la commençança de l’estiu, lo cònsol de Marselha Jean-Claude GAUDIN a fach votar un projèct de valorizacion dau relarg dei calancas amb la creacion d’un centre ostelier provesit d’equipaments de lesèrs (escarlimpadas, VTT, cabuçadas…), una ostalariá dei grandas que deuriá s’auborar au cimèu dau Mont Ròse qu'es aquesta còla entre la Poncha Roja e lei Godas. La comuna voudriá crompar un tenament de la Marina Nacionala qu’es ara mai o mens en dolilhas per aquest projèct. " Es pas coma l’afortis la Comuna un projèct d’ecò-torisma, es un projèct de bronza-cuòu classic que classic ! " s’encanha  Michèle PONCET-RAMADA, conselhiera municipala dei Verds.

  Per dire lo verai, ara, de mai en mai de toristas que venon a Marselha, venon a l’encòp descurbir la ciutat bota, un molon venon tanben per faire una escorreguda dins lo massis dei calancas. A dream, aquelei calancas ! Se parla de mai en mai dins lei medias d’aquesta mineralitat de bauç blancs que se quilha en ribas de Mediterranèa…De bauç de caucari sauvertos dins lo blu dau ciele e que recaptan quauquei tresaurs de plantum maugrat que siegan tant despolhats a vista de nas, e ont se tròba un bèstiari endemic amb l’aigla de Bonelli o la rassada (lézard ocellé), de bèstias qu’an aqui dins la garriga o dins lo bauç, sei nichas ecòlogicas. La rassada, aquest lesert es lo pus grand d’Euròpa que son mascle pòu faire 70 cm de lòng e a la cabeça d’un verd dardalhant  fòrça estonant. Aquesta rassada es en via de s’avalir pecaire emai dins l’indifferencia generala…

Adonc, meme se lei calancas son despuèi d’annadas un site classat, se vei que l’especulacion immobiliera poncheja. Mr GAUDIN diguèt qu’era possible d’afavorizar l’aparament dei calancas tot en defendant son projèct. Pasmens, s’es lo cas, que prenga de mesuras vertadieras per aparar lo bestiari, lo plantum emai lo biò-tòpe amenaçat en limitant promier lo sèti ai veituras çò que commença de se faire mai pas pron ! Rares son lei ròdols coma l’illa de Lanzaròtte ai Canarias ont an sachut combinar valorizacion toristica e aparament de la biò-esfera. Una manifestacion se faguèt a l’apèu d’un desenau d’associacions dissabte 22 de setembre sus la Canebiera per faire rebuta a n’aquest rosigar de mai dins lei calancas de Marselha e per demandar un pargue nacionau. Uech ans après sa creacion, l’Acampament d’Interest Public dei Calancas deuriá oficialament èstre missionat per prefigurar aquò. Ai darrierei novèlas, lo cònsol de Marselha conscient dau rapòrt de fòrça e beleu espaurugat per la mau-parada politica ai Municipalas a venir auriá ren de còntra…Anam abans e veirem Berra !